Archive | નીતિન વડગામા RSS feed for this section

છોડી દે

20 સપ્ટેમ્બર

એક  બે  ત્રણ  ચાર  છોડી  દે.
ઊગતો   અંધકાર   છોડી  દે.

તોજ નમણી નિરાંત નિરખાશે,
તુ   તને  બારો  બાર  છોડી દે.

આપમેળેજ આવી મળશે એ,
અહર્નિશ એના વિચાર છોડી દે.

આજની   મહેકજ   માણી  લે,
કાલનો  ઘેઘૂર  ભાર   છોડી  દે.

હાથમાં લેવું પડે હલેસું પણ ,
માત્ર મનનો મદાર છોડી દે.

સુખની ચાવી તનેય સાંપડશે,
એક  અમથી  નકાર  છોડી  દે.

છેડ  છાડ  ઝાઝી  તું  રહેવા  દે,
સ્હેજ   છેડીને   તાર છોડી  દે.

પ્રાણ પ્રગટી જશે સ્વયંય એમાં,
શબ્દની  સારવાર  છોડી  દે.

-નીતિન વડગામા